វេលាម៉ោង២:៣០នាទីរសៀល ថ្ងៃព្រហស្បតិ៍ ១២កើត ខែមិគសិរ ឆ្នាំរោង ឆស័ក ពុទ្ធសករាជ ២៥៦៨ ត្រូវនឹងថ្ងៃទី១២ ខែធ្នូ ឆ្នាំ២០២៤ នៅភូមិសំរោងជើងភ្នំ ឃុំសែនដី ស្រុកសំរោងទង ខេត្តកំពង់ស្ពឺ
ក្រោមអធិបតីភាព ឯកឧត្តម បណ្ឌិត ម៉ុង ឫទ្ធី ប្រធានក្រុមសមាជិកព្រឹទ្ធសភាប្រចាំភូមិភាគទី៧ និងជាប្រធានគណៈកម្មការទី៣ និងលោកជំទាវ ម៉ែន ស៊ុន ម៉ុង ឫទ្ធី អមដំណើរដោយក្រុមសមាជិកព្រឹទ្ធសភាប្រចាំភូមិភាគទី៧ និងសមាជិក-សមាជិកាគណៈកម្មការទី៣ មន្រ្តីការិយាល័យអមក្រុមភូមិភាគទី៧ និងមន្ត្រីលេខាធិការអមគណៈកម្មការទី៣ បានអញ្ជើញចូលរួមក្នុងពិធីសំណេះសំណាលជាមួយប្រជាពលរដ្ឋ អាជ្ញាធរភូមិឃុំ, បុគ្គលិក, ក្រុមការងារគ្រឿងចក្រ និងប្រជាពលរដ្ឋសរុបប្រមាណ ២៥០នាក់ ព្រមទាំងពិធីបេីកការដ្ឋានជីកស្រះទឹកថ្មីមួយកន្លែង ឈ្មោះថាស្រះទឹកចុងព្រែក ដែលមានទទឹង១០៣ម៉ែត្រ បណ្តោយ១៥០ម៉ែត្រ ដែលអាចស្តុកទឹកបានចំនួន ១៤០.០០០ម៉ែត្រគូប ក្នុងគោលបំណងជួយទប់ស្កាត់ទឹកហូរធ្លាក់ពីលើភ្នំម្រះព្រៅ កុំអោយមានផលប៉ះពាល់ដល់ការធ្វើស្រែរបស់ប្រជាពលរដ្ឋ និងអាចយកទឹកមកប្រើប្រាស់ នៅពេលរដូវប្រាំងអូសបន្លាយម្តងម្កាល។
បន្ទាប់ពីកម្មវិធីសំណេះសំណាលឯកឧត្តម បណ្ឌិតប្រធាន បានដឹកនាំគណៈប្រតិភូចុះពិនិត្យមេីលចម្ការដូងក្រអូប ចម្ការក្រូចថ្លុង និងហេដ្ឋារចនាសម្ព័ន្ធដែលបានស្ថាបនានៅក្នុងតំបន់រមណីយ៍ដ្ឋានកសិ-ទេសចរណ៍ ម៉ុង ឫទ្ធីសែនជ័យ ជាចុងបញ្ចប់នៃកម្មពិធីលោកជំទាវ បានរៀបចំអាហារពេលល្ងាចទទួលគណៈប្រតិភូ ដែលបានអញ្ជើញចូលរួមប្រមាណជា៤០នាក់ផងដែរ។
